智能廁板自行發熱冬天暖笠笠

智能廁板自行發熱冬天暖笠笠 選購要留意2大功能|附3大常見問題

文:裝修佬
智能廁板或智能座廁相信大家無用過都聽過,常見於日本大型商場、五星級酒店。冬天半夜用時真係好享受,暖笠笠坐得舒服。夏天又可以直接用水洗重要部位,唔再醃住同痕癢。如果想係屋企都有同樣享受,不妨考慮智能廁板。

智能廁板大家在日本旅遊時便見到得,原來在香港也一樣可以安裝使用。(GettyImages/視覺中國)

智能廁板大家在日本旅遊時便見到得,原來在香港也一樣可以安裝使用。(GettyImages/視覺中國)

 

安裝智能廁板有咩好?集恆溫、清洗、吹乾等功能於一身嘅智能廁板,全屋裝修或者直接加安裝都可以,唔受排污喉管限制,係入門嘅升級選擇 。而且使用簡單,特別適合屋企有孕婦,老人家或有行動不便嘅人士。香港夏天又熱又焗,洗得乾淨可以減少皮膚敏感發炎嘅機會。 

現時市面上智能廁板牌子種類多,佢哋無論係款式或者功能上都大同小異,喺選擇購買上多少會有困難,到底有啲咩功能需要留意呢?相信大家都有好多疑問,裝修佬話你知。  

 
部分智能廁板有兩個獨立噴嘴,提高衛生程度。圖為一個美國品牌出品的智能廁板。(作者提供)

部分智能廁板有兩個獨立噴嘴,提高衛生程度。圖為一個美國品牌出品的智能廁板。(作者提供)

 

1) 選擇獨立噴嘴

現時市面上智能廁板都會具有一條移動式噴嘴噴暖水清洗下身,但人體結構上男女有別,使用上多少會有差別。最好選擇有獨立分開兩條噴嘴設計,除咗基本臀部清洗之外,加有特別針對女性清洗噴嘴,避免交叉感染。 

擔心會有衛生問題?放心,噴嘴係每次使用前都會先自行清潔。加埋防護檔板避免尿漬、污漬彈入,沖得乾淨之餘更保障衛生。 

 
另外有廁板設有抗菌功能,買家可以留意圖中的標誌。圖為日本製智能廁板。(作者提供)

另外有廁板設有抗菌功能,買家可以留意圖中的標誌。圖為日本製智能廁板。(作者提供)

 

2) 抗菌暖板 

智能廁板除咗清洗功能之外,最吸引人嘅莫過於係暖板功能!冬天使用真係勁窩心。智能廁板會配合人體溫度令廁板保持於27°至36°之間,但潮濕溫暖嘅廁所環境容易滋生唔同嘅細菌及大腸桿菌,有見及此,坊間已經研發到將抗菌技術融入到廁板當中。可以留意廁板上有無抗菌製品技術協會SIAA嘅抗菌驗證。 

 
 
如要安裝智能廁板,需要留意數個距離。(作者提供)

如要安裝智能廁板,需要留意數個距離。(作者提供)

 

智能廁板應該點揀? 

留意返每個座廁嘅長短尺寸不同,揀選前可以自己度下座廁3個距離,如果符合到智能廁板規格要求,咁基本上有8成配合到 。 

睇到呢度相信大家已經對智能廁板已經有一定嘅了解,咁日後揀選嘅時候就容易得多啦。溫馨提示:留意係香港買行貨智能廁板時候可以問店員有無安裝師傅可以轉介,水電等問題可以由安裝師傅處理。

 

其他常見問題

問:點解智能廁板的坐圈size,通常都好細?
答:因為智能廁板要預留空間收藏發熱線,令大家冬天時坐得舒適。

問:用咗智能座廁/廁板仲需要使用廁紙嗎? 
答:唔需要。多個硏究報告中,廁紙係生產過程中可能已經受到汚染,係潮濕嘅廁所環境中容易滋生細菌,如果品質較差嘅廁紙可能情況更惡劣。所以做用智能座廁/廁板,水洗完直接吹乾,係衛生上比廁紙更佳,對老人家,孕婦或行動不便人士亦更方便。

問:一家多人使用會否變得唔衛生?
答:大多數智能座廁/廁板會係每一次使用前後都會先自行清洗噴嘴,選購時可以留意是否用抗菌物料製造,有沒有獨立噴嘴及擋板。

 

作者簡介:
裝修佬是家居裝修奇難雜症專家,希望透過文章分享及網上互動,解答巿民各式裝修難題,改變大眾對裝修方式和置家理念。

 

作者facebook專頁:https://www.facebook.com/hkdecoman/​

 

 

轉載自:https://www.hk01.com/%E7%86%B1%E7%88%86%E8%A9%B1%E9%A1%8C/284120/%E6%99%BA%E8%83%BD%E5%BB%81%E6%9D%BF%E8%87%AA%E8%A1%8C%E7%99%BC%E7%86%B1%E5%86%AC%E5%A4%A9%E6%9A%96%E7%AC%A0%E7%AC%A0-%E9%81%B8%E8%B3%BC%E8%A6%81%E7%95%99%E6%84%8F2%E5%A4%A7%E5%8A%9F%E8%83%BD-%E9%99%843%E5%A4%A7%E5%B8%B8%E8%A6%8B%E5%95%8F%E9%A1%8C